Minister Hakim ta duna tèst di E-Government lus bèrdè

KOMUNIKADO DI PRENSA
27 di Novèmber 2011
Willemstad – Minister Hakim a duna lus bèrdè pa Ministerio di Desaroyo Ekonómiko, huntu ku kompanianan BearingPoint, Ernst & Young i Be-Informed kuminsá tèst e posibilidat pa duna servisio via un bentana di pèrmit digital.

Durante seis siman Ministerio di Desaroyo Ekonómiko i un tim di profeshonal riba tereno di maneho, lei, teknologia i IT, lo traha huntu pa realisá e proyekto ‘Curaçao Online Vergunningenloket’. BearingPoint, Ernst&Young i Be-Informed ta ofrese nan servisionan pa e pilot grátis. Minister Hakim a duna e inisiativa aki riba tereno di E-Government lus bèrdè pa kuminsá. “Hopi ta haña e transishon di servisio di kara pa kara pa un servisio digital difísil. Komo gobièrnu, nos mester yuda i fasilitá durante e transformashon aki”, asina Minister Hakim a bisa durante e reunion ku e tim.

Ministerio di Desaroyo Ekonómiko ta realisando su aspirashon pa kita e, asina yama, red tape ku ta kousa retraso i difikultat den e proseso di pèrmit, i kambia esaki den un red carpet ku ta fasilitá desaroyo di empresanan i invershon. Segun Minister Hakim, gobièrnu ta habri pa diferente inisiativa ku por resultá den un agregashon positivo na e esfuerso di su ministerio. Kompania di consultant, BearingPoint, a ofresé pa hasi un tèst ku un sistema outomátiko, ku e ophetivo pa sinkronisá i fasilitá e proseso di akordá pèrmit i promové e klima di invershon. Segun Vanessa Gijsbertha di BearingPoint, e servisio digital ta un, kaminda e kliente lo tin un bista general riba legislashon, maneho i instrukshon den un mira. “Nos lo kombiná e prosesonan aktual i produsí un sistema ku ta mas fásil pa kontrolá”, su kolega Ingeborg Boswinkel a añadí. Durante seis siman e kompanianan BearingPoint, Ernst&Young i Be-Informed lo traha riba e proyekto aki. Den yanüari e tim lo evaluá e resultadonan. Si e pilot ta eksitoso, por introdusí e forma aki di kontakto digital entre pueblo i gobièrnu na mas ministerio.